KALIBO, Aklan—Ginapahauman eon it Police Regional Office 6 ukon PRO-6 ro igapatuman nga hugut nga seguridad para sa paeaabuton nga mga mabahoe nga events sa bilog nga Western Visayas.
Raya hay matapos nga ginpasugtan eon ro balik sa normal nga face to face celebration makataliwan ro masobra sa daywang dag-on nga pagpaiway kara tuga it COVID-19 pandemic.
Suno kay PMaj. Mary Grace Socorro Didulo Borio, OIC, Regional Public Information Officer nga igabalik nanda ro implementasyon it major events security framework kabulig ro iba pang natungdan nga ahensiya it gobyerno.
Bangud nga nagapabilin ro paeag it COVID-19, ginpahayag ni PMaj. Borio nga hugut gihapon nga igapatuman ro minimum health protocol nga gintaeana it Inter-Agency Task Force sa pihak it pagbuhos it mga tawo.
Ro importante suno kana nga maskin naga-enjoy sa mga gina-agtunan nga festival hay masiguro nga eowas ro kada isaea.
Nasayuran nga makaron hay ginapasugtan eon ro boluntaryo nga pagsuksok it facemask sa open spaces ag bukon it matawong lugar nga may maayos nga bentilasyon.
Pihak nga parte, nakadepende sigon sa iga-request nga augmentation force it provincial director sa regional office sa paeaabuton nga opening salvo it Ati-atihan Festival 2023 sa Oktubre 8 agud nga magbantay sa event.
Ginpahayag dugang nga ginapahauman man nanda makaron ro Masskara Festival sa Bacolod City sa Oktubre 23, Ati Atihan ag Dinagyang Festival sa Enero.
Raya hay mag-eowas pa sa nagahilapit nga pista minatay, paskwa ag bag-ong dag-on nga selebrasyon.
