KALIBO, Aklan—Plano it Police Regional Office (PRO)-VI nga uman nga buhion ro dati eon nandang ginproponer nga pagbutang it sangka police officer sa kada barangay sa bilog nga Western Visayas.
Suno kay Police Lieutenant Colonel Joem Malong, tagapaghambae it PRO-VI nga ro pagbutang it police sa kada barangay hay para matueopangdan ro problema ag mga krimen nga nagakaeatabo.
Sanda sigon ro magiging aktibo sa crime prevention effort sa barangay kamana man magabulig sa tyempo it disaster ag pandemya.
Sa raya sigon nga pamaagi hay maproteksyonan ag magiging eowas ro mga pumueoyo.
Plano sigon nanda nga i-assign ro mga police personnel sa anda mismong barangay para mas makilaea kara ro mga tawo ag ro mga nagakaeatabo sa kumunidad.
Engkaso sigon nga kueang ro numero it mga police nga iga-deploy hay iga-cluster lang sigon raya it tagsa ka mga police station para ma-monitor ro sitwasyon sa kada barangay.
Tuyo sigon kara nga pabaskugon ro “Police-community partnership”.
Nasayuran nga ro programang “pulis sa barangay” hay nauna eon nga ginproponer ko 2001 apang owa masustinahan rason nga makarun hay uman rayang pagabuhion.
