KALIBO, Aklan—Nagapangatubang sa patong-patong nga kaso ro sangka eaeaki matapos nga ginhana kara nga bun-on ro sangka policewoman nga nagsita kana sa banwa it Makato.
Ginpasakaan it kasong Direct Assault of Person in Authority with a use of deadly weapon, disobedience, resistance ag illegal possession of deadly weapon ro suspek nga si Sony Boy Sotero, 53-anyos ag residente it Brgy. Agcawilan, Lezo matapos nga ginhana nga bun-on ro biktimang si Patrolwoman April Joy Asejo, 24-anyos, residente it Roxas City ag presenteng naka-assign sa Makato Police Station.
Base sa report, ginhambaean sigon it pulis ro suspek nga isuksok ro anang face mask apang uwa raya nagpamati ag nagtalikod pa sa otoridad rason nga ana raya nga ginsundan nga ginkaakig man ni Sotero.
Bangud kara, insigida sigon nana nga ginliab ro policewoman ag ginhana nga bun-on sa leog gamit ro sangka kutsilyo nga kapin sa an-om nga pulgada ro haba apang gilayon man nga nakalikaw ro pulis hasta nga nakit-an raya it mga miyembro it Makato Auxiliary Police ag ginbira ro alima it suspek.
Sa pihak kara, nakaangkon gihapon it tyansa ro suspek nga makapaeagyo apang naeagas raya it mga otoridad ag natigayon nga naaresto.
Si Sotero hay presenteng nakahunong sa lock-up cell it Makato Police Station para sa nagakaigong disposisyon.
