KALIBO, Aklan—Kinahang-ean nga makaangkon it laye agud nga maduea ro political dynasty sa Pilipinas.
Raya ro panugyan ni former Bayan Muna representative Teddy Casiño matapos mataeopangdan ro magkapamilya nga nagdihon it certificate of candidacy ko mga nagtaliwan nga inadlaw.
Suno kana, pwede nga himuon raya it kongreso apang sa nakikita makaron hay ginahimo nga family business ro pulitika rason nga uwa it nagabaskog it boot nga makahimo it laye para maduea ro magpamilya sa pulitika.
Ginpaathag ni Casiño nga nakabaehag sa 1987 Constitution nga dueaon ro political dynasties apang uwa it nagakatabo kara hasta sa presenteng dag-on.
Uwa it maskin sambilog nga mamalidha nga nagahueag kontra sa pagpamayagpag it magkapamilya, mag-ina, mag-ama ukon magkaeampod sa pulitika.
Ro nagakatabo suno kana halin pa kato hay nagabueos-bueos eamang sanda sa pwesto ag uwa naila nga maduea kanda ro poder ag gahom para sa andang pangkaugalingon nga interes.
Ginakasubo ni Casiño nga ro pulitika sa Pilipinas hay kabaliskaran sa ginapahayag nga demokrasya bangud nga haeos tanan nga probinsya hay magkapamilya ro nagaangkon it poder imbes nga taw-an it kahigayunan ro iba pang pumueoyo nga may ikasarang nga magdumaea it banwa.
