KALIBO, Aklan – – – Nagdihon it proposal si Raymond Sucgang, Senior Science Research Specialist it Philippine Nuclear Research Institute (PNRI) agud estudyuhan it uman ro epekto sa isla it Boracay sa sueod it an-um nga buean nga pagsarado kara.
Suno kana nga tuyo kara nga ma-monitor ro level it mga pollutants kapareho it nitrate ag phospate nga nagatuga it polusyon sa isla.
Pinaagi sigon sa nasambitan nga re-study masayuran kun ro deklarasyon nga 6-months total closure hay epektibo.
Bilang sangka scientist ag environmentalist, naga kinahangean suno kana it pahuway ro isla nga maeayo sa human intervention agud makaangkon raya it “natural healing” rason nga naga pabor imaw sa pagpasara kara.
Suno pa kay Sucgang mabahoe nga bulig konta ro mga wetlands bangud dikara nagapatigayun it natural decontamination ro mga pollutants kapareho it phospate nga mabo-oe sa mga sabon.
Apang, masubo nga pila eon lang ro nabilin sa mga raya matapos nga gin patukuran it mga istraktura.
Aminado man raya nga bukon it sigurado nga maibalik sa dati ro Boracay apang, ro importante sigon hay mabuligan raya agud ma-rehabilitate.
Nasayuran nga hugot nga iga monitor it PNRI ro quality it tubi sa isla agud makahimo it rekomendasyon nga maga depende sigon sa kataas it level it pollutants.
Kaparte it andang plano hay mabuligan ro natural nga bacteria nga sanda ro magkaon it mga pollutants agud mapadasig ro pagtunaw kara sa bulig man it humbak.
