National News———Ginpasiguro it Philippine National Police (PNP) nga owa naadto sa anomalya ro owa man masyadong nagastos nga pondo it National Task Force to End Local Communist Armed Fund para sa Pambansang Pulisya ko 2020.
Raya ro pagklaro ni PNP Chief Police General Guillermo Eleazar matapos ro puna kanda sa Commission on Audit sa low disbursement it budget para sa anti-communist insurgency projects.
Base sa COA report, kapin sa P86.57 million eamang ro nagastos it PNP sa andang anti-communist programs.
Boot hambaeon, may balanse pa ro PNP nga P482.1 million maghalin sa P722.9 Million nga pondo nga ginpaguwa it Department of Budget and Management (DBM) ko 2020.
Suno kay Eleazar, bangud sa pandemya, ro ginrelease eamang nga pondo hay nag-abot sa kabilugang P722.955 million sa PNP ko Oktubre 26, 2020 ag indi pa raya puwedeng gastuson tanan sa nabilin nga daywang buean it 2020 bangud sa strikto nga pagsinueondan it layi sa paggastos it pondo it taumbayan.
Pagklaro ni Eleazar sa COA ag publiko owa it maskin sangka sentimo sa pondo it PNP ro naduea bangud sa korapsyon bangud raya hay buwis it taumbayan nga dapat alagaan ag indi pag-interesan.
Ginpasiguro man kara nga pagapabaskugon pa it PNP andang kampanya kontra sa insurgency.
