Nagtaeana ro Department of Budget and Management (DBM) it haeos P1 trilyong pondo ukon katumbas it 15.4% halin sa proposisyong pondo sa 2025 nga P6.352 trilyon para sa sektor it edukasyon.
Ro nasambit nga sector hay ginakaeakipan it Department of Education, State Universities and Colleges, Commission on Higher Education ag Technical Education and Skills Development Authority.
Nasayuran nga mas mataas ro proposisyong pondo sa 2025 it education sector nga una sa kabilugang P977.6 bilyon kumpara makaron nga 2024 nga una sa P968.9 Bilyon.
Sa kada nasyon, ro edukasyon hay ginakabig nga nagapangunang haligi sa pag-umwad. Inde mabalibaran nga sa makaron, kita hay nagapangatubang sa hangkat it kakueangan sa pondo para sa sektor it edukasyon.
Importante ro tamang pagtaeana it pondo bukon eamang it para sa mga imprastruktura kundi pati eon man sa mga manugturo, kagamitan, ag mga programang pangsuporta sa mga estudyante.
Ro pag-angkon it bastanteng pondo hay magatao it daean sa mas mataas nga kalidad it edukasyon. Ro mga eskwelahan hay nagakinahang-ean it maayos nga pasilidad ag kagamitan agud mas maipakita it mga manugturo ro andang kasayuran ag mas mapadali ro pagkaantiguhan it mga estudyante.
Kon may bastanteng pondo, puwedeng maitaguyod ro mga programang pang-training ag benepisyo nga magatueod sa mga manugturo nga mas pasanyugon ro andang obligasyon.
Sa kabilugan, ro tamang pagtaeana it pondo sa sektor it edukasyon hay bukon it sangka luho kundi sangka kinahang-eanon.
