INTERNATIONAL News — Padayun nga naka-confine sa ospital ro 88-anyos nga si Pope Francis matapos nga makaangkon it pneumonia sa parehong baga.
Raya ro ginpahayag it Vatican ko Martes, kun sa siin ginasugid nga una eon man raya sa mayad nga kahimtangan.
Ro santo papa hay na-admit sa Gemelli Hospital sa Roma ko Biyernes it nagtaliwan nga domingo bangud sa bronchitis, apang ginpahayag it Vatican nga ginbag-o ro pagbueong kana matapos ro ginpatigayon nga mga eksaminasyon.
Nakadugang sigon ro polymicrobial infection sa anang bronchiectasis ag asthmatic bronchitis nga nagakinahangean nga gamitan it cortisone antibiotic therapy.
Sa follow-up chest CT scan nga ginpatigayon sa Holy Father hay nagapakita it pag-umpisa it bilateral pneumonia rason nga nagakinahangean pa it dugang nga pagbueong.
Kat imaw hay 21 anyos pa eamang, gin-operahan si Pope Francis ag ginbo-oe ro parte it anang tuo nga baga matapos nga magkasakit it pleurisy nga haeos nagtuga it anang kamatayon.
Maabu sa mga pilgrim ag turista hay nagtililipon sa Saint Peter’s Square ko Martes agud nga magpangamuyo para sa madasig nga pagmayad ni Pope Francis.
Bukas gihapon ro posibilidad para kay Pope Francis nga magresign kun indi eon nana masarangan nga tumanon ro anang mga obligasyon.
Apang sa sangka memoir nga na-publish ko nagtaliwan nga dag-on, ginpahayag ni Pope Francis nga owa imaw it bastante nga rason agud nga maka-isip it paghalin sa pwesto.
Madumduman nga nauna eon nga ginkakibot it bilog nga kalibutan ro pagresign kato ni
Benedict XVI ko 2013, ro kauna-unahan ko Middle Ages nga nag-resign bangud sa anang ikamayad nga eawas.
