Opisyal eon nga ginbaton ni Pope Leo XIV ro ”Ring of the Fisherman” ukon Piscatory Ring nga nagasimbolo sa awtoridad it Santo Papa bilang kabueos ni San Pedro.
Ro nasambit nga seremonya hay ginhimo kasunod it Mass of Inauguration, adlaw it dominggo, Mayo 18, sa St. Peter’s Square.
Ro singsing hay ginsuksok kana ni Cardinal Luis Antonio Tagle, Pro-Prefect it Dicastery for Evangelization.
Ro pagbaton sa singsing hay sambilog sa mga nagapangunang bahin sa pag-umpisa it sangka bag-ong Santo Papa, ag ginakabig nga makasaysayan nga tanda it anang obligasyon sa pagdumaea it Simbahang Katolika.
Ro Piscatory Ring, nga nag-umpisa pa ko ika-13 siglo, hay simbolo it awtoridad ag saeabton it Santo Papa bilang kabueos ni San Pedro, ro Apostol nga Mangingisda.
Dati raya nga ginagamit bilang sign net ring sa pag-seal it mga opisyal nga dokumento hasta ko 1842, apang makaron hay ginagamit eon lang sa seremonyal nga pamaagi.
Kada Santo Papa hay may kaugalingon ag tumaeagsahon nga singsing.
Kon namatay ro Papa, ro singsing hay ginasamad agud nga inde eon raya magamit it uman.
Ro singsing ni Pope Leo XIV hay nagapakita kay San Pedro nga may mga yabe ag lambat, bilang simbolo sa pagpadayon it misyong gin-aywanan ni Kristo kay Pedro.
