KALIBO, Aklan—Nag-abot eun sa 109,035,343 ro kabilugan nga populasyon sa Pilipinas.
Raya hay matapos nga makalista it dugang nga 8,053,906 sa ginpatigayon nga 2020 Census of Population and Housing it Philippine Statistics Authority hasta ko May 1,2020.
May una man rayang 1.62 percent nga growth rate kumpara sa dating populasyon nga kapin eamang sa 100, 981,437.
Samtang, ginpahayag man ni Mrs. Rodelyn Panadero it PSA- Aklan nga nag-abot man sa 615, 475 ro kabuligan nga populasyon sa bilog nga pobinsiya.
Raya hay una sa 8 percent it total population sa Western Visayas nga kapin sa 7,954,723.
Nasayuran nga ro populasyon it probinsiya hay nagsaka it 40, 652 maghalin sa 574, 823 ko dag-on 2015, nga kung i-translate sa annual population growth rate (PGR) hay 1.45 percent, nga mas mataas sa 1.35 percent PGR sa period ko 2010 hasta 2015.
Sa 17 ka mga munisipalidad, ro banwa it Kalibo ro may pinakamaabo nga populasyon ko 2020 nga nag-abot sa 89, 127.
Nagtaas raya it kapin sa 8, 522 ka mga persona maghalin sa 80, 605 nga nairecord ko 2015.
Ginsundan man raya it banwa it Malay nga may unang 60, 077, Ibajay nga may 52, 364, New Washington 47, 955, ag Nabas nga nakalista it kabilugang 40, 632.
Kung tipunon ro populasyon it limang ka mga nasambitan nga munisipalidad hay naga-abot raya sa 47.14 percent it bilog nga populasyon it probinsiya ko 2020.
Sa pihak nga parte, ro banwa it Lezo ag Madalag man ro may unang pinakamanaba nga populasyon nga nag-abot sa 15, 639 ag 18, 890.
Samtang sa 327 ka mga barangays sa Aklan, ro Manoc-Manoc sa Isla it Boracay, banwa it Malay ro naka-record it pinakamataas nga population nga may unang 20, 504.
Ginsundan man raya it Brgy. Andagao sa banwa it Kalibo nga may 15, 404, Brgy. Poblacion, Kalibo nga may 12, 000, Brgy. Buswang New, Kalibo 11, 382, ag Balabag sa Malay nga may 10, 282.
Sa pihak nga parte ro Capataga (Malinao) man ro nailista nga may smallest population nga may 53 persons nga ginsundan man it Tamokoe (Tangalan) 133, Rivera (Ibajay) 201, San Isidro (Banga) ag Cabugao (Ibajay) 266.
Kung sa distrito man ro paga-istoryahan, ro Eastern district ro may pinakamataas nga populasyon nga naga-abot sa 313, 775 ukon kapin sa 51 percent it populasyon sa probinsiya.
Raya hay ginakaeakipan man it Kalibo 89, 127 ; New Washington 47, 955; Banga 40, 318; Batan 33, 484; Balete 30, 090; Libacao 28, 272 ; Altavas 25, 639; ag Madalag 18, 890.
Sa pihak nga parte ro Western district hay may una man nga total population nga 301, 700.
Raya man hay ginakaeakipan it Malay nga may 60, 077; Ibajay 52, 364; Nabas 40, 632; Numancia 35, 693; Makato 29, 717; Malinao 24, 517; Tangalan 23, 704; Buruanga 19, 357; ag Lezo nga may 15, 639.
Sa tanan nga mga probinsiya sa Western Visayas, ro Negros Occidental ro may pinakamataas nga populasyon nga 2,623,172; ginsundan raya it probinsiya it Iloilo nga 2,051,899; Capiz 804,952; Aklan 615,475; Antique 612,974; Bacolod City 600,783; Iloilo City 457,626 ag Guimaras 187,842.
Nasayuran nga ro nasambitan nga datos it populasyon ko 2020 hay gindeklarang opisyal ni President Rodrigo Duterte ko July 6, 2021 kasunod it Proclamation No. 1179.
