KALIBO, Aklan—Posibleng mag-abot pa sa 65 pesos ro pagbaeayluhan it piso kontra dolyar.
Raya ro panan-awan ni Bombo International Correspondent Greg Aguilar it California, USA.
Suno kana nga bilang sangka negosyante man, temporaryo eamang raya ag puwede pang magbag-o depende sa magiging hueag it Estados Unidos agud nga mapanaba ro andang inflation.
Kada nagapataas suno kana it interes rates ro Federal Reserves ukon ro Central Bank it Amerika hay mas nga nagabaskog ro dolyar.
Bukon eamang ro Pilipinas ro naka-experiensiya sigon it pagsadsad it balor it andang kwarta kundi maskin ro iba pang currencies sa bilog nga kalibutan.
Kapareho it British pound sterling ag euro nga haeos magkapareho eon ro balor sa dolyar.
Ro mga investment funds sigon hay nagabalik makaron sa US kun sa siin gina-aywan nanda ro mga developing countries kapareho it Japan, China ag Europe bangud nga makabig makaron ro US bilang sangka manami nga investment destination tuga it mabaskog nga dolyar.
Sa pihak nga parte, ginpahayag pa ni Aguilar nga may mga winners ag losers sa pagtinaas it balor it dolyar.
Bentaha kara ro mga balikbayans ag ro mga Overseas Filipino Workers bangud nga ro andang remittances hay all time high.
Apang pierde ro mga importers bangud nga kinahangean nanda nga magbayad it dolyar sa mga imported goods nga ginabakae.
Samtang, indi sigon pwede ibasoe sa gobyerno ro pagsadsad it piso bangud nga nakadepende raya sa Federal Reserves ag bilog nga kalibutan ro nakabatyag kara.
Nagapati imaw nga mapahagan-hagan it gobyerno ro problema kon indi masyadong mag-import it mga produkto ag serbisyo nga imaw ro naka apekto sa hueag it inflation.
Laygay nana sa mga ordinaryong pumueuyu nga magbakae anay it local products ag ipaiway ro mga mahae nga imported goods samtang sa mga manggaranon, indi anay i-invest ro dolyar sa US bangud nga mabahoe ro epekto kara sa ekonomiya it nasyon.
