KALIBO,Aklan– Mabaskog makaron ro bali-balita nga posibleng maga-iba sa sangka team sanday Los Angeles Lakers star LeBron James ag Golden State Warriors star Stephen Curry.
Suno kay bombo international correspondent greg aguilar it California , USA nga engkaso nga matabu, posibleng ro andang team ro magiging mabaskog nga makabangga it Denver Nuggets ag mabahoe ro posibilidad nga sanda ro maga-kampeon sa NBA finals sa masunod nga dag-on.
Gusto sigon it daywang player nga antes nga magretiro hay maangkon ro ika-limang championship sa NBA.
Ro pag-iba sigon nanday Curry ag James hay makabulig agud nga ma-maximize it daywang star player ro pagwakas eagi it andang career eabi eon ni James bangud sa anang edad nga 38.
Nauna eon nga gin aku ni James nga ginakonsidera nana ro pagretiro kasunod it kapierdihan it Lakers sa Nuggets sa Western conference finals.
Imaw hay sa idaeum it kontrata it Lakers para sa 2023-2024 season.
Sa pihak nga parte, ginpahayag pa ni aguilar nga nagapati ro mga sports analysts sa US nga magapabilin nga mabaskog ro Nuggets sa NBA sa 2024 bangud nga puro bata ro andang mga players.
May posibilidad sigon nga uman nga magabaskog ro Lakers ukon ro Golden State Warriors kon madugangan it sambilog pang star player ro andang team .