KALIBO, Aklan—Sangka concerned citizen ro nagpaabot sa Bombo Radyo Kalibo nga posibleng nagakinahangean anay it temporaryo nga kalinong sa lugar nga ginasugid nga gin-eumsan it 15-anyos nga si Jhuros Flores sa Brgy. Polo Banga.
Suno sa owa nagpakilaea nga concerned citizen nga raya hay base sa anang naging eksperyensiya sa natabu nga pagka-eumos man it andang igbata sa Brgy. Albansan, Numancia haeos limang dag-on eon ro nakataliwan.
Nakaangkon man sigon it maeapnagon nga search, rescue and retrieval operation nga nagbuhay it pilang adlaw hasta nga ginpundo eon lang ko ulihi .
Nagtawhay sigon ro lugar matapos nga owa eon ro mga usyusero nga nag-abang.
Matsa indi sigon mapatihan bangud nga makataliwan ro tatlong buean hay gulpi eamang nga nakita ro eawas it anang igkampod sa tubi nga matsa bag-o eamang namatay kumpara sa ginaeauman nga una eon kunta sa state of decomposition ukon nagaka-agnas eon.
Ro natabu suno kana sa anang igkampod hay nagapamatuod nga may ginatawag nga underworld .
Makabig suno kana nga palhi ro lugar nga gin-eumsan it binatilyo rason nga nagapati sanda nga indi ipaguwa it taglugar ro eawas it biktima mintras abu ro tawo sa lugar.
Angot kara, nagabuylog sigon ro nasambit nga concerned citizen sa kalisod nga gina-agihan makaron it pamilya Flores.
