KALIBO, Aklan—Nagapabilin nga overwhelming ro baeatyagon ni Engr. Marvien Bangcaya it Brgy. Union, Nabas matapos nga napabahin ro anang pangaean sa mga nakapasa sa Mechanical Engineer Licensure Examination nga nagguwa ro resulta ko August 10, 2023.
Suno kana, uwa naging madali ro anang mga inagyan eabi eon kat naabutan sanda it pandemya sa pag-eskwela.
Apang, uwa nana raya ginkabig nga sab-eag sa baylo hay mas pa imaw nga nagpursige kon sa siin ginpabaskog pa gid nana ro anang pagtuo sa Diyos sa bulig man it anang pamilya para makatapos hasta nga nakapagreview.
Ginpahayag dugang nga naging positibo imaw ag kumpyansa nga makapasa bangud sa anang pagsalig sa Diyos ag ro maid-id nga pagreview hasta nga uwa imaw napas-eawan nga maging engineer.
Samtang sa pihak nga parte, ro handom nga makabulig ag mahaw-as sa kapigaduhon ro pamilya ro nagdaea kay Engr. Mar Base, tubong probinsya it Iloilo iya sa banwa it Buruanga.
Si Engr. Base hay sambilog man sa mga nakapasa sa nasambit nga eksaminasyon kon sa siin napatangis imaw sa kalipay matapos nga makit-an ro anang pangaean nga makabig eon nga lisensyadong engineer.
Suno kana, nagpaamolya imaw iya sa probinsya it Aklan agud nga makatapos sa pag-eskwela bangud nga inde haeos masarangan it anang ginikanan nga paeskwelahon imaw sa kolehiyo rason nga nagschool boy imaw sa ana nga tiya.
Haeos tanan suno kana hay ginhimo nana para mabuligan man ro anang kaugalingon kadungan kara ro hantop nga pangamuyo nga inde imaw mapas-eawan nga maging lisensyadong engineer kaparehas sa iba.
Angot kara, eubus man ro anang pagpasaeamat sa tanan nga nagbulig kana para maabot ro nasambit nga kadaeag-an sa anang kabuhi.
