KALIBO, Aklan—Positibo ro naging reaksyon it pilang pumueoyo sa unang 100 diyas sa pwesto ni Kalibo Mayor Juris Bautista-Sucro.
Suno kay alyas Jun, negosyante sa Kalibo Public Market nga manami ro gin-umpisahan it alkalde para sa progreso ag pagbag-o it banwa.
Partikular nga gintumod kara ro pagpanami sa Kalibo Pastrana Park ag pag-aspalto sa karsada.
Ginakalipay sigon nanda ro inisyatibo it alkalde bangud manami eon ro pagmaneho sa daeanon bangud natabunan eon ro mga eubak-eubak.
Kung imaw sigon ro pagakutan-on, 80 porsyento ro anang igatao nga score sa unang 100 diyas ni Mayor Juris sa pwesto.
Sa pihak kara, gusto man sigon nana nga ipaabot ro anang concern pag-abot sa merkado publiko.
Nagaeaum sigon imaw nga matutukan ag ubrahon nga sambilog sa prayoridad it alkalde ro konstruksyon it bag-ong tindahan para maging paborable sa parehong bumaeakae ag negosyante.
