NATIONAL News — Ginapapundo it Department of Agriculture (DA) ro poultry importation halin sa ap-at nga estado it Amerika para mapugngan ro pagkalhit it bird flu sa Pilipinas.
Ginmandu it DA ro import ban pinaagi sa Memorandum Order No. 11 sakop ro domestic ag wild birds ag andang produkto, kaibahan eon ro poultry meat, day-old chicks, mga itlog ag semilya halin sa Illinois, Minnesota, Ohio ag Wisconsin.
Raya ro ginpahayag it DA sa memo matapos nga ginreport it Estados Unidos ro pilang outbreaks it ‘highly pathogenic avian influenza’ ko Pebrero 3 nga maka-apekto sa domestic birds.
Ginmandu it ahensya ro ban para mapugngan ro pagsueod it avian influenza ag maprotektahan ro ikamayad nga eawas it local poultry population sandig sa naging direktiba nga ginpirmahan ni Agriculture Secretary Francisco Tiu Laurel Jr. ko Pebrero 18.
Insigida man kara nga ginsuspinde ro ‘processing, evaluation ag issuance’ it sanitary ag phytosanitary import clearance para sa mga nasambit nga produkto.
Nauna kara, ginbawi eon it DA ro import ban sa poultry products halin sa Ohio ko Hunyo it nagtaliwan nga dag-on ag sa Minnesota ko nagtaliwan nga Nobyembre.
Samtang, ro Amerika ro sambilog sa major suppliers it meat products it Pilipinas, buyot kara ro export market share nga 15.2% sa nagtaliwan nga dag-on.
