KALIBO, Aklan — Nagpadumdum ro Philippine Red Cross – Aklan Chapter sa publiko angot sa mga kinahangeanon nga kondisyon ag pagpahaum bago ag pagkatapos mag-donate it dugo agud nga masiguro ro kaeowasan it mga blood donor.
Raya hay angot sa nakataeana nga dag-unan nga bloodletting project nga “Dugong Bombo 2026” it Bombo Radyo Philippines ag Star FM, hin-aga nga adlaw it Sabado, kun sa siin, masobra sa daywang dekada eon nga ginapatigayon sa nasyon.
Suno kay Mary Jo Galleon, PRC Aklan Chapter administrator nga kinahangean nga una sa mayad nga pang-eawason ro donor, edad 18 hasta 65 anyos, may timbang nga indi maganaba sa 50 kilos ag nakapasa sa physical ag medical screening.
Ro mga naga edad it 16 hasta 17 anyos hay nagakinahangean suno kana it pahanugot it ginikanan ukon guardian .
Bago mag-donate, ginalaygayan kara ro mga donor nga makaangkon it bastante nga pahuway, magkaon it maayos ag likawan ro mga mamantika nga pagkaon, uminom it maabu nga tubi ukon juice ag maging tampad sa pagsabat angot sa medical history eabi eon kun nagpaturok it anti rabies vaccine, gina-inom nga bueong ukon maintenance medicine, biyahe, tattoo ag piercing.
Ro mga indibidwal nga nagbiyahe sa ibang nasyon hay posibleng temporaryong indi pagapasugtan nga mag-donate it dugo.
Base sa guidelines, may an-um nga buean nga deferral para sa mga nag-agto sa mga nasyon sa Asya ag sang dag-on man para sa mga nagbisita sa mga nasyon sa Europa.
Pagkatapos man it blood donation, importanteng mag-inom it maabu nga likido, likawan anay ro mga mabug-at nga oeobrahon ag magbutang it pressure sa ginboe-an it dugo kun patudayun ro pagdugo.
Gin-engganyo ni Galleon ro publiko nga sundon ro nasambit mga giya agud nga maging eowas ag maayos ro proseso it pagtau it dugo nga pwedeng makabulig sa pag-eowas it kabuhi.
Ro Dugong Bombo 2026 nga may temang “A Little Pain, A Life To Gain” hay pagahiwaton sa ABL Sports and Cultural Complex sa Capitol Site, Kalibo.
