KALIBO, Aklan—Paga-umpisahan eon it Philippine Red Cross (PRC)-Aklan Chapter ro pagbaton ag pag-kolekta it saliva sample para sa mga gustong makabo-oe it RT-PCT test result it Coronavirus Disease 2019 ukon COVID-19 gamit ro eaway umpisa sa huwebes nga adlaw, Abril 22, 2021.
Raya hay matapos maobserbahan nga maabu nga mga pumueuyu sa Aklan ro gustong magpa-book para sa saliva covid test nga pagagamiton sa andang nagkaeain-eain nga transaksyon sa atubang it pandemiya partikular ro mga nagabiyahe ag naga apply it trabaho.
Kasunod kara, ginklaru ni PRC -Aklan chapter administrator Mary Joe Galleon nga naga-kolekta eamang it saliva sample ro andang taeatapan kaibahan ro andang sanga sa isla it Boracay.
Igapadaea sigon nanda raya sa andang molecular laboratory sa Passi City, Iloilo.
Kada Huwebes nga adlaw eamang sigon sanda magabaton it sample umpisa ala 1 hasta alas 3 it hapon ag kinahangean nga makaangkon anay it nagakaigo nga koordinasyon ukon nakapa-rehistro.
Sa mga gutong magpaidaeum sa nasambit nga bag-ong method, kinahangean sigon nga mag kolekta it ‘1 to 2 milliliters’ it andang eaway , apang kinahangean nga raya hay klaru, colorless, ag bukon it mapilit ag malapot.
Sanda sigon ro maga-provide it funnel ag container.
Gindugang pa ni Galleon nga ro mga gustong magpaidaeum sa saliva test hay indi anay magkaon, mag-inom, magsigarilyo , mag-lip stick ag iba pang butang nga nagagamit it baba 30 minutos antes ro test
Ro saliva test suno kana mag-eowas nga bukon it masakit hay nagabalor eamang it P2,000 pesos nga mas barato kaysa sa nasal swab test nga naga-abot it P3,800 pesos ag pareho man nga syento porsiyentong epektibo sa pag-detect it COVID-19.
Ro resulta sigon kara hay pwedeng mabo-oe 24 oras kumpara sa swab test nga naga abot it 24 hasta 48 oras.
Ginpahayag dugang nga ro saliva test hay mas eowas kumpara sa swab test bangud nga ro parehong pasyente ag health workers hay owa it masyadong contact.
Ro PRC-Aklan hay posibleng makabaton it 10 hasta 20 nga samples para sa saliva tests kada huwebes nga adlaw.
Ginalaygayan man ro mga nagapa-test nga antes owa pa ro resulta hay magself-isolate anay.
