KALIBO, Aklan—Nagbutang it sangka airconditioned medical tent ro Philippine Red Cross (PRC) sa provincial hospital sa probinsiya it Aklan.
Raya hay kasunod it nagataas nga numero it mga nagamasakit it dengue sa probinsiya.
Ro nasambit nga tent hay sabat sigon sa nagapang-eapaw nga pasyenteng nagapakonsulta ag na-admit sa nasambit nga ospital nga kon sa siin, magasirbi raya bilang hydration unit ag dengue fast lane.
Nauna kara, nagdeklara it outbreak ro provincial government kasunod it nailistangkaso nga naga-abot sa 3,524 ro mga nagamasakit it dengue sa umpisa Enero 1 hasta Hulyo 27 kun sa siin 16 ro namatay.
Sa ginpaguwa nga pahayag it Philippine Red Cross ko Hulyo 25, ginpahayag ni Chairman Richard Gordon nga doble-kayod makaron ro 93 nga blood service facilities sa bilog nga nasyon agud nga masiguro nga bastante ro supply it dugo partikular ro plasma ag cryoprecipitate nga ginagamit agud nga mapugngan ro hemorrhagic complications tuga it dengue.
