KALIBO, Aklan—Kasado eon ro preparasyon it barangay council it Tigayon, Kalibo kaeakip ro pila nanda nga security plans pilang adlaw antes ro Semana Santa.
Suno kay punong barangay Gil Morandante it Tigayon, Kalibo nga kada Semana Santa hay may nakadeploy nga mga pulis, tawuhan it Provincial ag Municipal Disaster Risk Reduction and Management Office, Philippine Red Cross ag iba pa sa lugar bangud sa pagbuhos it mga tumueo-o eabi eon kada Huwebes ag Biyernes Santo.
Nagabulig man sigon sa pagbantay it seguridad ag daeagan it trapiko ro andang mga barangay tanod.
Padumdum nana sa publiko nga indi mag-agto sa lugar nga hilong, sundon ro ginapatuman nga patakaran sa pagsaka sa Bukid Tigayon ag indi magkalhit it basura.
Dugang pa nga doblehon ro pagdahan, maging maging alerto ag ireport ro anumang makadueudang insidente.
Ginaeauman suno kana nga mas maabu ro magadagsa makaron nga mga tawo bangud nga haeos sa vacation mode ag excited eon nga magwarang ro tanan.
Sa pihak nga parte, panawagan pa ni kapitan Morandante nga suportahan ro andang kada dag-on nga Bugna it Tigayon sa Marso 28 kun sa siin nagkaeain-eain ro mga baligya nga tanum, tinuean-on ag kakanin nga himo it mga tumandok it nasambit nga barangay.
Kaeabanan nga ginadayo ro Bukid Tigayon it mga pilgrims kada Holy Week eabi eon ro mga gustong magpatigayon it Via Crucis, para sa spiritual enrichment ag para sa nature lovers.
