Magarbo ag makasaysayan nga koronasyon ro ginaeauman it tanan nga igapatigayon sa May 6, adlaw it Sabado sa Westminster Abbey, London.
Raya hay ro opisyal nga pagkorona kay King Charles III bilang hari it United Kingdom.
Suno kay Bombo International Correspondent Ramil Isogon it United Kingdom nga sigidas eon makaron ro preparasyon sa bilog nga United Kingdom para sa ginakaeangakagan nga makasaysayang okasyon.
Kapin sa 2000 nga dinapit nga mga bisita sigon ro ginaeauman nga magatambong sa nasambit nga koronasyon.
Ginakaeakipan raya it mga royal family maghalin sa bilog nga Europe ag world leaders.
Samtang, pagakoronahan man ro anang asawa karang si Queen Camilla bilang Queen Consort.
Kadungan kara, sa mismong adlaw it koronasyon hay may mga maintok man nga grupo ro magapatigayon it hubeag protesta nga nagapamaeabag sa liderato ni King Charles.
Ginapahayag nga bilang kaparte it tradisyon nga coronation service, raya hay magasuksok it daywa ka set it robes.
Raya ro the Robes of State ag the Robes of Estate.
Maga-ilis man raya it makapilang beses ag magasuksok it nagkeain-eain ag makasaysayan nga sueoksukon nga gingamit man it mga nagtaliwan nga monarchs sa anda man nga naging koronasyon, kaeakip eon kara ro pinakaluma nga vestments sa Royal Collection.
Raya ro robe nga ginsuksok ni King George IV ko nagtaliwan nga dag-on 1821 sa anang koronasyon.
Samtang pagkatapos it koronasyon, ro mga bag-ong korona nga hari ag reyna hay pribadong magaselebrar ag magapatigayon it Coronation Concert sa adlaw it Dominggo kaibahan ro mga pili nga miyembro it andang pamilya ag kaabyanan sa Windsor Castle.
