KALIBO, Aklan–All set eon ro preparasyon it lokal nga gobyerno it Kalibo para sa nagahilapit nga Opening Salvo it Ati-atihan Festival 2023 sa adlaw it Sabado, Setyembre 8.
Suno kay Kagawad Mark Sy it Brgy. Poblacion, Kalibo ag nagaserbing tagapaghambae ni Mayor Juris Sucro nga owa eon it anumang pagbag-o sa mga plano bangud plantsado eon ro tanan.
Ro magadugang eamang sigon hay ro performance it rockstar nga sikat ko dekada 90 nga haead it sangka negosyante kamana man nga ro food festival hay pagahimuon nga tatlong adlaw umpisa Setyembre 7 hasta 9.
Ginklaro man it opisyal nga owa pa it anumang kumpirmasyon sa opisina it alkalde angot sa pag-abot ni Vice President Sara Duterte.
Madumduman nga sambilog ro bise president sa gin-imbitahan nga magtambong sa opening salvo.
Samtang, ro mga gin-install sigon nga iwag sa pilang karsadahon ag palibot it Kalibo Pastrana Park hay dungan man nga paga-buksan sa nasambit nga okasyon.
Sa pihak nga parte, ginpasiguro man kara nga ginatinguhaan ni Mayor Sucro nga pataasan ro mga premyo para sa tribu ag maga-perform sa Ati-atihan festival.
Kaeakip eon kara ro target it alkalde nga P1 million nga grand prize.
Apang, pagahueaton eon lang sigon ro opisyal nga anunsyo it Kalibo Ati-atihan Festival Board kung siin nga kategorya raya igataeana.
