KALIBO, Aklan—Gintaw-an it seven out of 10 nga grado ni Aklan second district board member Jay Tejada ro kabilugan nga pagpanerbisyo ni Pangueong Ferdinand Marcos Jr. sa sueod it anang sang dag-on nga pagpungko bilang presidente it nasyon.
Sa 42 priority bills nga gintaeana it chief executive hay an-om eamang ro nakit-an nga naghueag ag tatlo ro naisalaye.
Makabig raya nga mahina apang kinahang-ean nga taw-an it benefit of the doubt si Marcos bangud nga naga-umpisa pa eamang imaw ag may mga natabong sitwasyon nga beyond his control kaparehas it gyera sa tunga it Russia ag Ukraine; pagpanaeasa it pandemya ag makaron hay ro eapnaag nga epekto it African Swine Fever.
Samtang sa pihak nga parte, gintaw-an it incomplete nga grado ni board member Tejada si pangueong Marcos bilang sekretaryo it Department of Agriculture ukon DA bangud sa mahina nana nga pagdumaea sa nasambit nga departamento.
Dapat sigon nga gamiton eon nana ro anang poder ag stratehiya sa senado ag kongreso para matuman ro anang gintaeana nga priority bills.
