KALIBO, Aklan–Nag-aywan si dating Pangueong Fidel Valdez Ramos ukon mas kilaea sa tawag nga FVR ag Eddie it makolor nga legasiya kamana man nga naging sueod imaw it kasaysayan it nasyon bangud sa mabahoe nga partisipasyon sa pilang pagbag-o sa Pilipinas bilang military ag presidente.
Suno kay Atty. Plaridel Morania, sangka batikang abogado sa Aklan nga si FVR hay sangka retiradong heneral ag politiko nga nagsirbi bilang ika-12 pangueo it nasyon umpisa 1992 hasta 1998.
Ko 1986 EDSA People Power Revolution, ginkilaea sigon si Ramos bilang sangka baganihan it maabu nga mga Pilipino sa anang desisyon nga magseparar sa pagdumaea ni dating Pangueong Ferdinand Marcos, Sr. ag nagpanumpa it katamparan sa bag-ong ayos nga gobyerno ni Pangueong Corazon Aquino.
Sambilog sa mga tumatak sa administrasyong Ramos hay ro programang “Philippines 2000” nga nagatuyo nga obrahon nga industrialized ro nasyon umpisa ko 2000 rason nga nabansagan raya nga Tiger Economy in Asia.
Raya sigon ro mabahoe nga pamana ni Ramos sa Pilipinas.
Ginsaysay pa ni Atty. Morania nga sa pagdumaea ni FVR hay nagpirma ro Moro National Liberation Front ukon MNLF it peace treaty sa gobyerno nga nagbuhay it ap-at nga dag-on.
Indi man makalipatan ro anang “thumbs up” sign ag “Kaya Natin Ito” slogan.
Nagserbi suno kana si Ramos bilang hepe it Philippine Constabulary sa idaeum it administrasyon it anang first cousin nga si Marcos Sr.
Imaw man ro nagpungko nga Armed Forces vice chief of staff, apang ko 1986, nagbueag si Ramos sa administrasyon ni Marcos, kaibahan si dating Defense Secretary Juan Ponce Enrile.
Raya hay agud nga pamunuan ro mga soldado sa pagpasakop sa EDSA Revolution nga nagpatalsik kay Marcos sa puwesto ag nagbutang kay Cory bilang pangueo.
Sa administrasyon ni Aquino, mabahoe ro naging papel ni Ramos bilang Armed Forces of the Philippines chief of ataff ag secretary it National Defense agud nga pugngan ro mga coup attempts.
Sambilog man si Ramos sa ginasugid nga naging instrumento para makumbinse si dating Pangueong Rodrigo Duterte nga magpadaeagan ko 2016 elections.
Sa idaeum it Duterte administration, ginbutang nga special envoy to China si Ramos ko 2016 apang nag-resign imaw matapos ro pilang buean.
Ginbatikos ni Ramos ro performance ni Duterte sa unang 100 days kara kaibahan eon ro pagpasugot ni Duterte nga i-eubong si Marcos sa Libingan ng mga Bayani.