KALIBO, Aklan—Kinahangean nga ipabilin sa tanan nga oras ro presensiya it Diyos sa aton nga kaugalingon.
Raya ro ginpahayag ni Fr. Tudd Belandres, parish moderator it St. John the Baptist Cathedral sa atubang it sunod-sunod nga mga kalamidad ag ro padayun nga paeag it coronavirus disease 2019 ukon Covid 19 pandemic.
Gin engganyo nana ro kada isaea nga padayun nga magpangamuyo ag magbulig sa mga nagakinahangean.
Importante suno kana ro magbueuligan sa makarondaya nga tiempo.
Ginpamilit ni Fr. Tudd nga ro pagpangamuyo eamang ro epektibong panagang it tawo kontra sa anuman nga trahedya.
Kon amat sigon hay nadumdumduman eamang it tawo si Hesukristo kon nagakalisod ag nagabaeatian eon.
Samtang, gindugang pa kara nga ro pagpakamatay bangud sa kalisod nga naexperiensiyahan hay bukon it solusyon kundi nga makadugang pa sa problemna nga ginapagatubang.
Ginhalimbawa nana ro paskwa nga nagatau it bag-ong pageaum sa kada isaea rason nga dapat raya nga pahauman.
Indi man sigon dapat nga puro materyal nga bagay ro isipon sa tiempo it paskwa bangud nga ro espiritu it paskwa hay nagasimbolo it presensiya it Diyos.
Ro tanan sigon nga mga nagakatabu makaron hay may mensahe, apang indi kita mag-isip it negatibo nga magaresulta sa frustrations.
Samtang, gindugang pa ni Fr. Tudd nga magaselebrar it advent season ro simbahang katolika sa makaron nga domingo.
Raya hay bilang preparasyon sa pag-abot ni Hesukristo sa tiempo it kapaskwahan.
