KALIBO, Aklan–Naiplastar it maayos ni President Ferdinand “Bongbong” Marcos Jr. ro anang mga gustong ipaabot sa pumueuyung Pilipino sa anang pagpanumpa sa pwesto ko Huwebes nga adlaw.
Suno kay Atty. Plaridel Morania, sangka batikang abogado sa Aklan nga ro anang diskurso hay nagsentro sa kaparehong mensahe nana ko tiempo it kampanya nga nagahinyu it pagbuylog ag pagiging bukas sa tanan.
Raya hay base sa anang pauman-uman nga pahayag nga ro “inyong handum hay handum ko man”.
Nagakahueugan suno kana nga raya ro pagaeauman sa anang administrasyon kun sa siin ro andang magiging aksyon hay igabase sa panan-awan, concerns, ag interes it publiko.
Samtang, pabor man si Atty. Morania nga si PBBM ro magabuyot anay sa department of agriculture para unlimited ro bulig nga igatau kara sa nasambit nga departamento.
Makaron nga nagapangatubang sigon ro nasyon sa krisis , importanteng matutukan ro agrikultura ag ekonomiya kamana man ro edukasyon.
Gindayaw man nana ro speech ni Marcos bangud nga owa raya nagpakamaeo ag owa eon naila nga balikan ro mga natabu sa nagtaliwan.
Importante suno kana nga mataw-an imaw it tsansa nga matun-an ro mga bagay agud nga makahimo it nagakaigo nga solusyon sa mga problema nga ginapangatubang it Pilipinas makaron.
Apang may pila sigon nga nadismaya bangud nga naggamit raya it lengwaheng English sa anang maeawig nga speech.
Sa pihak nga parte, baeantayan man suno kay atty morania ro kauna-unahan nga state of the nation address ni marcos kun sa siin posibleng dikara nana igaplastar ro anang mga handum ag aspirasyon sa masunod nga an-um nga dag-on.
