Ginpamalibaran ni Reynaldo Villanueva, presidente it senior citizen it Brgy. Andagao, Kalibo ro alegasyon kontra kana nga ginagamit sigon kara ro anang posisyon para sa planong pagpailihir bilang konsehal sa paaeabuton nga barangay ag sangguniang kabataan eleksyon makaron nga dag-on.
Una kara, nagpaabot it reklamo sa Bombo Radyo si Benedicto Igalin kon sa siin nataeopangdan nanda nga ginagamit ni Mr. Villanueva ro anang posisyon sa pederasyon sa pangkaugalingong interes kon sa siin ginabati-bati nga magapailihir raya sa pagkakonsehal sa maabot nga eleksyon
Ginpaathag ni Mr. Villanueva nga uwa it basehan si Mr. Igalin sa anang akusasyon bangud nga uwa pa imaw it ginpaguwa nga desisyon kon minatuod ro anang ginaeapog nga istorya.
Angot mat-a sigon sa pondo it andang pederasyon hay maskin kusing hay uwa it nakaabot kanda ag uwa sanda it ginabuytan.
Dugang pa nana nga ro anang opisina sa barangay hall hay halin mismo sa anang kaugalingong boesa ro ginpaayos kara.
Madumduman nga ginreklamo dugang ni Villanueva nga uwa haeos it oras kanda nga mga members ro andang presidente bangud nga kon may kinahang-ean kanda hay kon siin pa imaw mahagilap.
