KALIBO, Aklan–Ginpromisa ni Democratic Party of the Philippines ukon DPP presidential candidate Dr. Jose Montemayor Jr., nga pagatapuson nana ro korapsyon, kriminalidad ag COVID-19 sa oras nga maabot ro anang handum sa kabuhi nga maging presidente it Pilipinas.
Sa Comelec-KBP PiliPilipinas Forum 2022, ginpahayag kara nga ro nasyon hay nagapangatubang makaron sa masyadong seryosong krisis eabi eon ro pandemya.
Bukon eamang suno kana ro health condition it nasyon ro dapat nga tutukan kundi maskin ro pagbangon it ekonomiya.
Ginpahayag dugang nga ginaduso man nana kaibahan ro anang running mate nga si Rizalito David ro “christ-centered governance” ukon ro ginatawag nga faith-based approach agud nga magpangibabaw ro Diyos sa tanan nga bagay.
Bangud kara, indi sigon nanda pagsuportahan ro same-sex marriage, abortion, divorce ag death penalty.
Gusto man nga temporaryong suspindihon ro vat sa produktong petrolyo agud nga mapahagan-hagan ro kalisod sa sunod-sunod nga oil price increase.
Pagasuportahan man sigon kara ro alternative medicine ag ro pagbulig sa mga pumueuyu nga makaangkon it kaugalingon nga negosyo.
Agud nga matapna ro kriminalidad, paga-ayuson kara ro justice system agud nga mapabaskog ro law and order ag masiguro ro kaeowasan it publiko.
Samtang, ginpasiguro it anang ka-tandem nga si vice presidential candidate rizalito david nga kapareho sa pagdumaea ni vice president leni robredo, magiging malimpyo man ro anang pagbuyot sa nasambit nga taeatapan sa oras nga magdaog sa eleksyon.
Madumduman nga sa tatlong magkasunod nga dag-on hay gintaw-an it commission on audit ukon COA ro office of the vice president it pinakamataas nga audit rating.
Importante suno kana nga maging modelo it iba pang taeatapan it gobyerno.
Magiging focus sigon it anang atensyon ro moral regeneration.
Samtang, gin endorso man kara ro kandidatura nanday presidential candidate Leni robredo ag vice presidential candidate Tito Sotto.
