Ginkilaea ni Pangueong Ferdinand “Bongbong” Marcos ro Presidential Security Group (PSG) kaangot it serbisyo ag dedikasyon kara nga ginpakita maskin sa mga nagtaliwan nga dag-on.
Sa mensahe it commander-in-chief kaangot it pagtapos sa ginpatigayun nga VIP protection course it PSG, ginpahayag kara nga bukon eamang it makadayaw-dayaw ro debosyon it mga PSG nga mapangalagaan imaw ag ro first family kundi pati eon ro iba pang VIPs.
Nagserbi man nga representante it pangueo sa okasyon ro presidential son nga si Ilocos Norte Rep. Sandro Marcos nga nagpaabot it anang mensahe.
Sambilog man sa mga nagsipagtapos sa VIP Protection Course ag kaparte it Classes 129-2022 ag 130-2022 hay ro aktor nga si Matteo Guidicelli.
Suno kay 2nd Lt. Guidicelli, sangka mabahoe nga kadungganan nga imaw hay kaparte eon it Presidential Security Group matapos nga mapili nga magpaidaeom sa nasambit nga pag-ensayo ag maging parte eon it elite force nga magapangalaga sa presidente ag sa first family.
Si Guidicelli nga sangka reservist it Philippine Army ro kauna-unahang celebrity reservist nga magiging miyembro it Presidential Security Group.
