KALIBO, Aklan—Nagtingob pwersa ro nagkaeain-eain nga law enforcement agency agud nga makit-an ro ginatugis nga si Stanley Mercado, sa legal nga edad ag tubo it Mindoro matapos nga makapaeagyo samtang nakadetini sa lock-up cell it Banga Municipal Police Station, Martes it agahon.
Mag-eowas kara, ginamitan eon it drone camera agud nga matumod eagi ro nakahimtangan it suspek nga nakakomiter it heinous crime apang napas-eawan ro mga awtoridad nga makit-an si Mercado.
Ginsaysay it pila sa mga nakakita nga tumakas ro suspek paadto sa Barangay Bulwang, Numancia halin sa Aklan river kon sa siin imaw nagpaanod maghalin sa banwa it Banga.
Sa nabuoe nga impormasyon it Bombo News Team, nag-eaong sigon sa mga pulis si Mercado agud nga makaihi sa C.R apang uwa eon nanda raya nataeopangdan ko ulihi ag nadiskubrehan nga nakapaeagyo eon imaw pinaagi sa pag-agi sa bintana.
Si Mercado hay nagapangatubang sa kasong rape matapos nga positibong ginturo it 17-anyos nga daeaga, residente it banwa it Tangalan nga raya ro naghimueos kana ag ginhana pa imaw nga patyon pinaagi sa pag-eook ag paghueog kana sa banglid apang maswerte nga nabuhi ag nakapangayo it bulig ro biktima.
Mag-eowas kara, naboe-an man it baril ag bala nga uwa it nagakaigong lisensya ag narekober man kana ro cellphone it biktima.
Ro nasambit nga suspek hay nadakpan sa entrapment operation nga ginkasa it Tangalan ag Banga Municipal Police Station.
