KALIBO, Aklan–Nagapabilin nga uwa it paghueag sa presyo it asin bangud nga bastante ro supply kara apisar nga medyo nagmahae ro tao it supplier maghalin sa probinsya it Mindoro.
Suno sa asin vendor nga si Arthur it Brgy. Andagao, Kalibo, naapektuhan man it pandemya ro ana nga negosyo bangud nga kat uwa pa it krisis hay nakakaubos imaw it pilang ka sako apang makaron hay haeos katunga ro nabawas kara.
Apang, pasaeamat gihapon sigon imaw bangud nga sa pihak it pandemya hay padayon gihapon ro anang negosyo maskin amat-amat eang ro kita hay nakakasurvive man sa pang adlaw adlaw nga kinahang-eanon.
Nagabolante man sigon imaw sa ibang banwa sa adlaw it tinda ag makaron nga nagbalik eon ro mga bolantero sa banwa it Kalibo hay mabahoe raya nga bulig sa mga negosyante kamana man sa mga bumaeakae bangud nga makabakae sanda it barato mapa-tingi ukon bulto man.
