Batyag eon ro daeayon nga pagnaba it presyo it asukar sa mga nagapangunang merkado publiko sa banwa it Kalibo
Raya ro ginkumpirma ni Betty Robelo sangka negosyante it asukar sa Kalibo Public Market nga kun siin kapin sa tatlong dominggo eon sigon ro sigidas nga pagnaba sa presyohanan it asukar.
Base sa price monitoring nga ginpatigayon it Bombo Radyo Kalibo, ro dating P82-84 kada kilo it washed sugar hay nagaabot eon lang makaron sa P80 kada kilo kamana man ro brown sugar nga dating P82 hay P78 eon lang makaron kada kilo.
Raya hay may pagnaba pa sigon it kapin sa P2 kada kilo kung wholesaler.
Samtang, nagapabilin man nga P94 ro kada kilo it white sugar.
Madumduman nga nauna eon nga nagpahayag ro Department of Agriculture, nga makaron nga buean it Abril hay magataeana sanda it kapin sa P85-90 sa kada kilo it asukar sa mga nagapangunang merkado publiko sa bilog nga nasyon
