BUSINESS News—Nagapabilin nga mataas ro presyo it baboy sa mga baealigyaan sa pihak it manabang taripa sa gina import nga karne ag pagbaha kara sa merkado.
Sa datos it Department of Agriculture, nagahampang eon sa P350 hasta P380 pesos ro kada kilo it karneng baboy hasta ko hulyo 6 kumpara sa P320 hasta P340 pesos ko Hunyo, maeayo sa P225 pesos nga kada kilo ko January 2020 ukon bago makaangkon it COVID-19 pandemic.
Ro mas manabang taripa hay resulta it Executive Order 128 ni Pangueong Rodrigo Duterte ko April 7, bilang sabat sa inflationary effects it presyo it karne, kun sa siin ro imported pork nga naga abot sa maximum access volume ukon MAV hay pagapapanaugan eamang it 5% kumpara sa 15% tariff para sa mga mag-eampas nga quota.
Bangud sa manabang taripa, naga abot eon sa masobra sa P1.3 bilyon pesos ro nalugi sa gobyerno umpisa Abril hasta Hunyo ag ginaeauman nga magalobo pa sa 11 bilyon pesos hasta sa katapusan it dag-on.
Ko May 15, nag-issue man ro Pangueo it E.O. 134 agud nga bawasan pa ro taripa sa imported pork sa 10% sa sueod it 3 buean ag 15% sa masunod nga 9 nga buean.
Sa pihak kara, mas pang sumirit ro presyo it baboy kun sa siin nag eampas eon sa P400 pesos ro kada kilo sa pilang baealigyaan.
