KALIBO, Aklan—Ginpahayag it sangka meat vendor sa Kalibo Public Market nga nagapabilin sa dating mga presyo ro karne it baboy makaron nga bisperas it Paskwa.
Suno kay Arnel Meren, sangka negosyante ag presidente it asosasyon it mga vendors sa tindahan nga owa sanda nagpataas it presyo.
Nagapabilin sa 220 pesos ro kada kilo it unod ag pork chop, liempo 230 pesos, paras 150 ag kasudlan nga 120 pesos.
Samtang, ro karne it baka hay nagahampang sa 270 hasta 280 pesos ro unod ag ro ribs hay 195 hasta 200 pesos.
Ro presyo it manok hay 165 hasta 170 pesos ag ro native chicken hay 280 pesos.
Ginpahayag dugang nga nagapabilin nga normal nga adlaw ro andang pagbaligya makaron nga holiday season kumpara kat owa pa nagtama ro pandemya.
Kon dati suno kana hay nakaka-ubos sanda it 20 hasta 30 nga ka baboy , apang makaron haeos indi pa maubos ro andang lima hasta an-um nga baboy nga ginakatay.
Samtang, gindugang pa ni Meren nga haeos nagatumpok ro mga bumaeakae sa Oyo Torong ag mga talipapa sa Andagao ag Estancia bangud sa kawad-an it parking area sa tindahan nga eubus man nanda nga ginakadismaya nga mga negosyante.
Sa pihak nga parte, sangkiri man nga nakaangkon it pagtaas ro mga tinuea ag iba pang panakot.
