Makabig nga “reasonable” it sangka grupo it mga mangunguma ro pagtantiya nga pwedeng mag-abot sa P60 hasta P62 ro presyo it kada kilo it bugas pag-abot sa buean it Setyembre.
Ginpahayag ni Magsasaka Partylist Chairman Atty. Argel Cabatbat nga maskin may pagtaas sa presyo, makabulig raya sa mga mangunguma agud nga makabawi sa padayun nga pagmahae it mga gaeastuson sa produksyon, eabi eon sa abono.
Sa pihak kara, ginklaru ni Cabatbat nga raya hay owa nagakahueugan it mabahoe nga kita para sa mga mangunguma bangud nga nagapabilin nga mataas ro presyo it farm inputs.
Suno kana nga kon magtipid man sa abono, sigurado nga maganaba ro ani nga mas pa nga maka-apekto sa andang kita.
Nagaeaum man ro grupo nga indi eon maga-eampas pa sa P60 hasta P62 ro presyo it bugas agud nga indi man mabug-atan ro mga bumaeakae.
Suno kanda nga tuyo kara nga maangkon ro patas nga presyo para sa parehong mangunguma ag consumer.
Ginpahayag man ni Cabatbat ro pagkabaeaka sa padayun nga tensyon sa Middle East, nga pwedeng magtuga it domino effect sa pagtaas it presyo it langis ag iba pang baeak-eon, kaibahan ro bugas.
