KALIBO, Aklan—Bangud sa ginasugid nga bastante ro supply it baboy sa probinsya it Aklan, nagnaba man ro presyo it pagbaeak-eanay it buhi nga baboy.
Raya suno kay Grant Tarantan it Office of the Provincial Veterinarian ukon OPVET-Aklan ro sambilog sa mga rason kon ham-an it naga-average eon lang makaron sa P120 pesos hasta it P130 pesos kada kilo ro presyo it mga buyer.
Manaba ro nasambit nga presyo kon ikumpara ko nagtaliwan nga mga binuean partikular kat nagpaabot it reklamo ro mga hog raisers kon siin ginabueo it barato ro andang mga alagang sapat ag mahae gihapon ro baligya it karne kara sa merkado.
Apang, inde sigon mapredict suno kay Tarantan kon hasta san-o magabuhay ro nasambit nga suplay sa probinsya.
Ro karne it baboy makaron sa Kalibo public market hay nagapresyo sa P230 pesos hasta it P240 pesos kada kilo kamana man ro liempo hay P260 pesos kada kilo.
Samtang, pag-abot mat-a sa dressed chicken hay nagpondo makaron ro presyo sa P180 pesos kada kilo.
Mas manaba kon ikumpara ko nagtaliwan nga mga dinominggo nga umabot sa P200 pesos ro kada kilo.
