Ginaeauman nga makaangkon it magkaibang hueag sa presyo it produktong petrolyo sa masunod nga domingo, kun sa siin, posibleng magtaas it mabahoe ro presyo it diesel samtang maganaba man ro presyo it gasolina.
Base sa ap-at nga adlaw nga trading it Mean of Platts Singapore (MOPS) ag hueag it foreign exchange, ginaboeobanta nga magataas ro presyo it diesel it P4.00 hasta P4.50 kada litro.
Samtang, posibleng makaangkon man it rollback sa gasolina nga sa katung-anan it P1.00 hasta P1.50 kada litro.
Suno sa sangka source halin sa oil industry, ro pagtaas it presyo it diesel hay tuga it pagkabaeaka sa pangkalibutanon nga suplay it langis matapos sigon ro pagpundo it negosasyon para sa peace deal ag panibag-ong paeag it Iran nga eubusan nga isarado ro Strait of Hormuz.
Dugang pa kara, nakadugang man sa pagtaas it presyo ro pagkabaeaka nga posibleng magnaba sa kritikal nga lebel ro global oil inventories kun magapadayun ro presenteng kadasig sa paggamit it mga reserbang langis.
Sa pihak kara, ginpahayag it source nga may mga paunang indikasyon nga pwedeng magnaba ro MOPS prices sa ulihing adlaw it trading makaron nga domingo. Engkaso nga matabu, posibleng maagto sa manabang parte it pagtantiya ro dugang nga presyo sa diesel, samtang posible man nga mas mabahoe ro rollback sa gasolina.
Kaeabanan nga gina-anunsyo it mga kumpanya it langis ro andang fuel price adjustments kada Lunes ag ginapatuman kada Martes.
