KALIBO, Aklan–Nagpatigayun it price monitoring sa mga nagapangunang baeak-on sa Kalibo Public Market ro Office of the Provincial Agriculturist ko Pebrero 1.
Suno kay Roselyn Relado, Agriculturist II it Office of the Provincial Agriculturist nga amat-amat eon nga nagnaba ro presyo it kontrobersyal nga sibuyas ag bawang.
Base sa andang pagmonitor, ro presyo makaron it pueang sibuyas hay nagahampang halin P250 hasta P300 samtang ro imported nga red onion hay P280 hasta P300 ag ro puting sibuyas hay mabakae it P300 kada kilo.
Nagapabilin man sa dating presyo ro bawang nga P90 hasta P100 kada kilo.
Pag-abot mat-a sa mga karne, ro kada kilo it karne it baka hay P380, kasim P220, liempo P240 samtang ro manok hay P200.
Ro itlong mat-a hay mabakae sa balor nga P8.50 kada sambilog depende sa size.
Samtang, ro mga tinuean-on hay nakaangkon man it sangkiri nga pagtaas ag pagnaba sa tagsa-tagsa nga presyo.
Ro mantika hay mabakae sa presyong P90 kada litro samtang ro puti nga sukar hay P90 kada kilo, wash sugar P80 ag ro brown sugar hay P75.
