KALIBO, Aklan—Nagtaas ro presyo it karneng baboy sa mga baealigyaan sa Oyo Torong St., Kalibo.
Raya ro ginkumpirma it sangka meat vendor.
Sa price monitoring it bombo radyo kalibo, ro pinaka-ulihi nga presyuhan it karne it baboy sa nasambit nga talipapa hay P200 pesos sa kada kilo it pork pigue , 195 pesos ro kasim ag P190 pesos ro kada kilo it pork chop.
Ginapatihan nga naka-apekto sa presyo it baboy ro manaba nga supply.
Maskin sigon nga bastante ro mga naga-alaga it baboy sa Aklan, apang kaabuan sa mga karne hay ginapadaea sa Luzon.
Nasayuran nga pinaka naapektuhan it African swine fever ukon ASF ro Central Luzon ag Southern Tagalog rason nga ro mga baboy nga ginabaligya sa Metro Manila hay nagahalin sa Visayas ag Mindanao.
Mag-eowas sa local producers it baboy, naga-import man ro nasyon it produktong karne it baboy sa mga nasyon nga owa tinamaan it ASF.
