Bumagsak ro presyo it krudo sa world matapos gin-anunsyo it Iran nga “completely open” eon ro Strait of Hormuz sa mga commercials ships nga naga-agi kara.
Suno sa report, nagnaba it kapin sa $88 kada bariles ro Brent crude halin sa masobra sa $98, adlaw it Sabado.
Ro Strait of Hormuz hay sangka importanteng ruta nga nagadaea it haeos 20% it pangkalibutanon nga langis ag liquefied natural gas.
Ginpahayag ni Iranian Foreign Minister Abbas Araghchi nga pwede eon nga maka-agi ro tanan nga commercial vessels samtang ginapatuman ro ceasefire sa rehiyon.
Bangud kara, nagtaas man ro mga stock market sa U.S. ag Europa kun sa siin nagsaka ro S&P 500, Nasdaq, ag Dow Jones it masobra sa 1%, samtang ro mga merkado sa Europa kapareho it DAX sa Germany ag CAC sa France hay nagtaas it masobra sa 2%.
Madumduman nga nakaangkon it pagtaas sa presyo it langis ko nagtaliwan nga mga domingo bangud sa tensyon sa tunga it Iran ag Israel, kun sa siin nag-abot pa raya sa masobra sa $100 kada bariles ag sang beses nga nag-eampas pa sa $119.
Sa pihak it pagbukas it ruta, nagapabilin nga madahan ro pilang shipping companies ag ginpahayag nga magahueat anay sanda it tamang tiempo antes nga mag-agi sa nasambit nga lugar bangud sa isyu it seguridad.
Samtang, pilang analyst ro naghambae nga posibleng magapabilin nga pabag-o-bag-o ro presyo it langis samtang owa pa eubusan nga establi ro sitwasyon sa rehiyon.
