KALIBO, Aklan — Nakataeanang paga-umpisahan it Department of Trade and Industry ukon DTI-Aklan ro pag-monitor sa presyo it mga Noche Buena items ag Christmas decors sa probinsiya.
Apang suno kay Ma. Carmen Ituralde, OIC provincial director it DTI-Aklan nga sa makaron hay owa pa nakapaguwa ro andang national office it suggested retail prices ukon SRP it mga panghanda para sa nagahilapit nga Paskwa ag Bag-ong Dag-on.
Posible suno kana nga sa buean it Nobyembre hay may una eon sanda nga SRP para pang-Noche Buena ag Medya Noche.
Kadungan kara, ginpahayag ni ituralde nga ginatutukan man nanda ro mga ginabaligya nga Christmas lights kon nakasunod ro mga raya sa gina-prescribed nga requirements sa idaeum it Bureau of Philippine Standards.
Dag-unan sigon nanda raya nga aktibidad agud nga masiguro nga ro ginabakae it mga konsumidor hay may kalidad nga mga Christmas lights nga makalikaw sa anumang peligro ukon kahalitan sa propiyedad.
Sa makaron suno kana hay owa pa masyadong nagabaligya ro mga establisimento it mga Christmas lights ag iba pang christmas decors .
