KALIBO, Aklan — Nagahampang sa P18 hasta it P19 ro presyuhanay it eabtong nga paeay samtang P15 hasta it P16 man ro sa oga sa probinsya it Aklan.
Raya hay suno kay Willie Ann Encarnacion, agricultural technologist it Office of the Department of Agriculture (DA)-Aklan sa interview it Bombo Radyo.
Ro nasambit nga presyo suno kana hay mataas it tatlo hasta it ap-at nga piso kon ikumpara sa ibang probinsya.
Aminado imaw nga naapektuhan ro produksyon it paeay sa probinsya tuga it pagpasarado it irrigation system it National Irrigation Administration (NIA) ko nagtaliwan nga buean it Oktobre 2018.
Bangud kara, na-delay sigon ro pagtanom it paeay it mga mangunguma ag uwa nag-eksakto sa season nga nakaangdan kada cropping.
Apang, sa pihak it pag-angkon it adjustment, nagapabilin nga normal ro supply it paeay sa Aklan kasunod it harvest season kon siin maabong mangunguma ro nagapaani eon makaron nga panyempo.
Samtang, ginpadumdom man ni Encarnacion sa mga mangunguma nga tatapon it husto ro andang mga ueomhan ag inde pagpabay-an agud nga inde malugi pag-abot it tig-aeani.
