KALIBO, Aklan—Nagnaba ro presyo it pilang tinuea ag itlog samtang owa it anuman nga paghueag sa presyo it bugas, mais ag isda sa mga merkado publiko sa probinsiya it Aklan.
Raya ro ginpahayag ni James Earl Ogates, Regional Information Officer it Department of Agriculture ukon DA Region 6.
Sa andang price monitoring kaibahan ro agri business and marketing assistance division, sa Kalibo Public Market, nakaangkon it pagbawas sa presyo it pilang tinuea bangud sa bastante nga supply kapareho it hamtak nga 110 pesos eon lang makaron ro kada bundle halin sa 120 pesos.
Ro kaeabasa hay nagnaba it limang piso kada kilo nga halin s a 45 pesos hay 40 pesos makaron.
Kamana man ro taeong nga halin sa 80 pesos hay 75 pesos eon.
Sa pihak kara, may pilang tinuea man nga nagtaas ro presyo kapareho it kamatis nga halin sa 60 pesos kada kilo ko nagtaliwan nga domingo hay 62 pesos makaron kamana man ro okra nga halin sa 100 pesos hay 127 pesos eon ro per kilo.
Ro mga ginabiyahe man sigon nga mga tinuea halin sa Luzon kapareho it baguio beans, cabbage ag euy-a hay nagtaas it masobra sa 10 pesos bangud sa transport cost kasunod it pagmahae it presyo it produktong petrolyo.
Ro siling labuyo halin sa 200 hay 220 eon.
Sa pihak nga parte, ginpahayag pa ni ogates nga nakalista sanda sa pagtaas sa presyo it livestock and poultry products partikular ro pork ham ukon kasim nga nagahampang ro average price sa 265 pesos per kilo.
Batyag man suno kana ro pagtaas it presyo it mantika it haeos lima hasta 12 pesos bangud sa kakueangan it kopra.
Nagtaas man suno kana ro presyo it asukar.
Mabahoe sigon ro posibilidad nga magataas pa ro presyo it mga prime commodities bangud sa pagsueod it summer seaon ag oil price increase.
