Nagapabilin nga mabakae ro mga pork meat products sa merkado publiko sa banwa it Kalibo apisar nga may kumpirmado eon nga kaso it African Swine Fever ukon ASF virus sa probinsya it Aklan.
Raya ro ginkumpirma ni Celyn Dela Cruz sangka longganisa vendor sa Kalibo Public Market.
Nagapabilin sigon nga normal ro daeagan it andang baealigyaan sa pihak it daeang paeag it ASF virus.
Ginpaathag kara nga posible m malang nga makaangkon it pagtaas sa presyohanan it longganisa kung magataas man ro presyo it mga karneng baboy.
Ro kilo sigon makaron it mga karneng baboy hay nagapabilin nga P250 kada kilo.
Sa makaron, stable ro presyohanan it mga longganisa sa merkado publiko ag nagapabilin sa andang mga dating presyo.
Samtang, nagaeaum man ro mga negosyante it mga pork meat products nga kungta mapabilin nga bastante ro suplay it baboy sa pihak it hugot nga pagmonitor sa mga raya sa bilog nga probinsya it Aklan kasunod man it kumpirmadong kaso it ASF virus sa Brgy. Arcanghel Sur sa banwa it Balete
