Sa pihak nga owa pa napatuman ro plano it Department of Agriculture nga P150 kada kilo nga Suggested Retail Price (SRP) sa puea nga sibuyas , hay nagapabilin nga mahae ro presyohanan kara sa merkado publiko.
Suno kay Josephine Zonie, sangka negosyante sa Kalibo Public Maket, apisar nga bukon pa it aprubado ro P150 SRP it puea nga sibuyas hay ro nasambit nga presyo sigon ro presente nga ginapatuman nanda makaron sa pueang sibuyas.
Ginpahayag kara nga kapin sa P150 ro kada kilo makaron sa maintok nga pueang sibuyas. Samtang P200 man kada kilo ro mabahoe.
Kapin sa daywang dominggo eon sigon nga makarondaya ro andang presyohanan bangud sa mahae man anang boue sa anang supplier nga una sa sueod it Kalibo Public Market.
Angot kara, owa man sigon it mahimo ro mga manugbakae kundi magbakae eon lang it mga tingi-tingi nga maintok nga klase it sibuyas.
Sa pihak nga parte, nasayuran nga temporaryong ginhold ni Senior Undersecretary Domingo Panganiban ro memo may kaangtanan sa nasambit nga SRP.
Kinahangean pa sigon nga tun-an raya it mayad bangud sa bukon it kumbinsido si Senior Undersecretary Panganiban sa cost structure.
