KALIBO, Aklan–Nag-umpisa eon nga magnaba ro presyo it sibuyas sa mga baealigyaan sa Kalibo Public Market.
Sa price monitoring it Bombo Radyo Kalibo, una eon sa ₱200 hasta ₱300 pesos ro kada kilo it lokal nga sibuyas ag ginaeauman nga mas pang maganaba ro presyo kara sa pagsueod it mga imported nga sibuyas.
Suno kay Annie Gamboa, sangka negosyante sa tindahan nga kaabuan pa sa andang mga ginabaligya makaron hay mga lokal nga sibuyas nga bag-ong gin-harvest halin sa mindoro ag batangas.
Madumduman nga nauna eon nga ginpahayag it Department of Agriculture nga nagdesisyon ro gobyerno nga mag-import it sibuyas agud nga mapanaba ro presyo kara nga dating nag-abot sa 400 hasta 500 pesos ko holiday season.
Samtang, ginpahayag dugang ni Gamboa nga ginakabaeak-an sigon nanda ro amat-amat nga pagmahae it presyo it bawang bangud sa gina alegar nga kakueangan it supply.
Limitado suno kana ro ginatau kanda makaron it andang supplier, kun sa siin halin sa dating napueo nga bags hay lima eon lang makaron.
Nagapati sanda nga bangud sa pag-hoard it mga bentahosong negosyante ukon wholesaler rason nga nagtaas ro presyo it sibuyas ag makaron hay bawang eon man nga ginaeauman nga magasirit ro presyo umpisa sa masunod nga domingo.
Ro presyo it bawang makaron sa merkado hay nagahampang sa 100 pesos per kilo.
