Kalibo Aklan ———-Ginkumpirma it sangka staff it panaderya sa banwa it Kalibo nga nagpataas eon sanda it presyo it tinapay .
Suno kay Larsen Dante nga bangud sa pagmahae it maabu nga raw materials kapareho it harina, margarine , yeast ag powdered milk kamana man ro pagtaas sa presyo it liquefied petroleum gas ukon LPG hay nagpatuman sanda it piso hasta daywang piso nga patong sa andang mga produkto.
Sa iba nanda nga tinapay hay ginbawasan ro grams ag ginpa-alsa agud nga indi mag-isot samtang may una man nga klase it tinapay nga owa eon nanda gina-eaha eabi eon ro magastos sa sangkap.
Sa pihak nga parte, ro pangmasang produkto nga loaf bread , halin sa dating 45 pesos hay naging 50 pesos eon makaron bangud sa skimmed milk nga gina-import pa sigon halin sa Russia.
Pila sigon sa andang mga customer hay naintindihan ro andang sitwasyon rason nga owa eon nagareklamo sa price adjustment nga ginpatuman .
Nagpaandam pa imaw nga mabahoe ro posibilidad nga magapataas pa sanda it presyo apang nakadepende sigon raya sa management.
