KALIBO, Aklan—Gin-insister it grupong Bantay-Bigas nga ro mandu ni Pangueong Ferdinand Marcos Jr., nga pagtaeana it price ceiling sa bugas hay bukon it patas ag owa masyadong naestudyuhan.
Suno kay Cathy Estavillo, spokesperson it bantay bigas nga ro Executive Order No. 39 ni Marcos hay indi makasolbar sa problemang ginapangatubang makaron angot sa sigidas nga pagtinaas it presyo it produkto.
Sa baylo suno kana nga ro mga retailers ro hingabuton hay mas mayad nga tugison ro mga traders ag wholesalers nga sanda ro kaeabanan nga naga-hoard ukon nagatago it mga bugas ag paeay.
Ginakuwestiyon man it grupo ro gobyerno kon ham-an nga hasta sa makaron hay owa it maskin sin-o nga nakasuhan sa pihak nga may nadakpan nga mga hoarders sa parte it Bulacan kun sa siin natukiban sa mga warehouses nanda ro sangkaterbang sinako it bugas.
Suhestiyon kara nga dapat nga seryosohon ro kampanya kontra sa mga smugglers ag hoarders nga nagapa-antus sa mga mangunguma ag mga pumueuyu.
Panawagan pa nana nga mas pang eaparan ro mga kaeugtaan nga pagatamnan it mga paeay ag mais ag bungkagon ro hacienda system ag taw-an it bulig ukon subsidiya ro mga farmers pinaagi sa gamit sa produksyon, post harvest facilities, ag iba pa.
Handum eamang sigon it mga rice farmers nga indi baraton ro andang ani nga paeay nga mabakae sa presyo nga 20 pesos per kilo.
