KALIBO, Aklan—Pormal eon nga naga-operate ro Private Motor Vehicle Inspection Centers ukon PMVIC sa Roxas city, Capiz.
Suno sa Land Transportation Office ukon LTO-Region 6 nga ro tanan nga mga saeakyan nga igapa-rehistro sa andang ahensiya hay kinahangean nga mag-agi anay ag makapasa sa nasambit nga pribadong inspection center.
Sa bilog nga rehiyon sais, ro PMVIC hay ginbutang sa Roxas city.
Kumpiyansa ro LTO nga pinaagi sa bag-ong patakaran hay mapanaba ro mga aksidente sa daeanon.
Raya hay bangud nga mag-eowas sa pag-usisa kon nakasunod ro saeakyan sa emission standards hay pagatan-awon man ro roadworthiness it saeakyan ukon bagay pa raya nga magbiyahe antes nga pasugtan nga makapa-rehistro.
Nasayuran nga naga-abot sa 1,800 pesos ro inspection fee sa 1st testing sa mga 4-wheeled vehicles samtang 600 pesos man para sa motorsiklo.
Engkaso nga indi makapasa sa 1st testing, 900 pesos ro pagabayaran para sa re-testing sa 4-wheeled vehicle samtang 300 pesos man ro bayad sa re-testing sa mga motorsiklo.
