KALIBO, AKLAN— Gin pasiguro ni Police Regional Office ukon PRO-6 Spokesperson Supt. Gilbert Gorero ro hugot nga seguridad nga gina patigayun it kapulisan sa Western Visayas partikular eon sa isla it Boracay nga gina dagsa it mga local ag foreign tourists kasunod it summer season ag pagdumdum sa Semana Santa.
Gin klaro ni Gorero nga apisar owa it terror threat, bastante sigon ro numero it deployment it augmentation force it kapulisan nga mismong naghalin sa PRO-6 agud magbulig sekyar it seguridad sa isla.
May mga opisyal man sigon it kapulisan nga magapadueong sa Aklan ag Boracay agud chekyaron ro security preparations.
Gin hayag man ni Gorero nga nakaangkon ro kapulisan it covenant agreement sa mga Muslim Brothers nga naga kontra sa terorismo kamana man nga nagpasiguro nga magatao it impormasyon sa oras nga may kasayuran.
Nag apela man ro PRO-6 Spokesperson sa mga pumueoyo it suporta ag kooperasyon.
Sa oras sigon nga may nasayuran ukon may matueopangdan nga makadueodang tawo hay indi eon mag-daywang isip nga mag-report sa pulis.
Samtang, gin kumpirma man ni Gorero nga tanan nga leave it mga katapo it kapulisan hay kanselado mag-eowas eamang kun sick leave kamana man nga naka-full alert status agud maitao ro hugot nga seguridad nga kinahangean it pumueoyo.
